હે નાથ, જોડી હાથ પાયે પ્રેમથી સહુ માંગીએ

હે નાથ, જોડી હાથ પાયે પ્રેમથી સહુ માંગીએ, શરણું મળે સાચું તમારૂં એ હૃદયથી માંગીએ. જે જીવ આવ્યો આપ પાસે ચરણમાં અપનાવજો, પરમાત્મા એ આત્માને પરમ શાંતિ આપજો... (૧)

વળી કર્મના યોગે કરીને જે કુળમાં એ અવતરે, ત્યાં પૂર્ણ પ્રેમે ઓ પ્રભુજી આપની ભક્તિ કરે. લક્ષચોર્યાસી બંધનોને લક્ષમાં લઈ કાપજો, પરમાત્મા એ આત્માને પરમ શાંતિ આપજો... (૨)

સુસંપત્તિ, સુવિચારને સત્-કર્મનો દઈ વારસો, જન્મોજન્મ તમ ભક્તિથી કિરતાર પાર ઉતારજો. આ લોકને પરલોકમાં તમ પ્રેમ રગ રગ વ્યાપજો, પરમાત્મા એ આત્માને પરમ શાંતિ આપજો... (૩)

મળે મોક્ષ કે સુખ સ્વર્ગનાં આશા ઉરે એવી નથી, દ્યો દેહ દુર્લભ માનવીનો ભજન કરવા ભાવથી. સાચું બતાવી રૂપ શ્રી રણછોડ હૃદયે સ્થાપજો, પરમાત્મા એ આત્માને પરમ શાંતિ આપજો... (૪) હે નાથ, જોડી હાથ પાયે... ૐ

હરી ૐ

હરી ૐ પૂર્ણ એ છે, પૂર્ણ આ છે, પૂર્ણથી તો પૂર્ણ ઊગ્યું છે બધું પૂર્ણ માંથી પૂર્ણ આપી દ્યો ભલે, શેષ પાછળ પૂર્ણ રહેવાનું સદા.